(淘)優品 (淘)優品
返回首頁 站內 Google 百度
光明頂:首頁陶傑文章 052 純理性汽車批判

「德國是全民皆中產,人民的購買力和消費力已經上了軌道,最重要是,德國是一個好proud的國家,自己的國家本身已經是名牌,有音樂家華格納、哲學家康德、希特拉……出過很多猛,所以佢開這些名牌車就冇問題。換言之,汽車就是一種優生學,要夾人的質素,甚至是膚色,不配就是不配,你睇下勞斯萊斯賣廣告,會唔會搵個黑人賣?永遠冇得傾,呢樣就係咁現實!這種叫『齊大非偶』,意即從前的人嫁娶,娶一個齊大王個女,你娶得起咩?齊國這樣大、這麼富裕,你那些細國家如趙國、燕國,你咁自己娶你自己第三世界女!冇所謂!做人做事,最緊要就是跟身份相符。

「我住過NewYork同倫敦,有錢佬好多,邊有人(摣)『Ben屎』?亦非個個開勞斯萊斯,很多人有錢都不會買。第一,勞斯萊斯不是用來自己開,要請司機開。第二,招聘司機都好有學問,你估在地盤見到個擔泥有力,湖南走落新移民,然後用三千蚊請佢俾套靚制服佢就得咩?個司機都要有6呎身材、四十零歲,把口又要密,開口講英文隻accent要正,就算你真係請到呢件,豈不是個司機的質素還高過自己?買部勞斯萊斯做乜?哈哈……」

陶傑部車隨時都有幾本雜誌同報紙standby,等人的時候就會睇,費事浪費時間。

要去到幾時,香港汽車消費巿場才可以像歐洲般真正成熟?

「有排都未得!一個成熟巿場要多元化。在歐洲有一種汽車消費,叫做舊車買賣,CollectionCar,有很大market,香港就冇這個巿場,他們嫌這些車老套,又冇得維修,在英國你就可以隨時架很老的Bentley,我自己在英國買過東歐車,很老套,但很便宜,四百幾鎊(約港幣六千)一架易手價。在那裡,車是出個性格出來,我唔怕被人知道我窮,我唔怕被人知道呢架是窮人車,因為窮人車都有品味。香港又有多元化,架mini仔都俾人笑,俾人笑笑下就會冇自信,冇辦法確立自己的Identity,所以咪一窩蜂『Ben屎』,完全不是成熟表現。許冠傑都有唱:「你要『Ben屎』靠自己個腦。」我有腦自己就唔『Ben屎』。哈哈……成百萬咁Q貴,三個月就貶值,我不如成百粒去東莞買兩層樓,包條奶啦,哈哈,自己又得益,係唔係呀?同架車做呀?戇居!出架車溝女?條女如果係鍾意架車多過鍾意你,咁你不如去叫雞,慳番百幾皮!去深水就夠玩幾年啦,人條數都唔知點計!哈,哈。」

早在上年的《Cup》雜誌,你已經講過「中國發展汽車的問題」,可否補充多些?

「中個現時有13億人,假設10年後,有1億人開車,就即刻死!第一,石油不夠。現時每年石油的需求量為230,000,000噸,如果中國這麼多人開車,就起碼要花7-8千萬噸,佔了全世界三分之一。未來,北京、青島、上海和大連,這些所謂中產階級城巿,又要學西方國家人人車,浪費幾多汽油?另外,城巿基建配套又點?你有冇咁多車位?之後可能要大興土木興建多層停車場,要破壞幾多古蹟?拆幾多舊屋?拆幾多有特色和具歷史性的building?街邊又要泊表位呢。

「還有,驗車呢?現時大陸的汽車架架都光頭胎,日後個個都有私家車,一定要有嚴格的驗車標準。中國咁多貪汙,到時求其塞二百蚊俾佢,又可以過關,點算?還有考牌呢?考牌最容易『濕水』,香港60年代都曾經出現這些情況,學神一上車就俾利是個官,就唔會『肥』,將來大陸一定會重蹈覆轍,到時個個未考到牌就飛車,請不要忘記,自七十年代開始,中國個個家庭都實行『一胎化』,個個細路仔都在寵愛中長大,因為受到溺愛,他們的性格多是天不怕地不怕,一有錢,就一定買架車亂咁掟,到時意外率數字一定好高。

「西方國家其實已經行過這條路,證明這樣對環境對生態都冇好處,點解還要行舊路?自己又話有三千年歷史文化、又話有儒家道家、又話喜歡山水,現在就跟美國佬行舊路,就算幾有錢都被別人看扁。中國文化已經無法發揮出一個與眾不同的典範,最好就係:我唔需要開你那些名牌車,都可以過精神富足的生活。美國佬只得三億人,但佔用了全世界七成天然資源,他們可以這樣,你唔好以為我們都可以!因為他們付出極大代價,人家好多發明、好多人材,他們在二戰時用兩粒原子彈為日本佬清場;越戰死咁多人、韓戰死咁多人,他們維持世界和平秩序,所以他們有資格享用資源,中國就唔得!所以唔好學人家的生活形態!」

你曾經講過中國汽車發展冇出路,並提出儒、道、佛思想救中國,叫人重新過簡樸生活,似是流於吹水的想法,可有實際實行可能性?

「係,我係吹水,不過,假如中國有一個好有智慧和魅力的領袖,可以感化全國人民,像從前的印度甘地,他教印度人用手織布,棄用英國佬發明的機器,不要經過英國加工的貴價棉花,有個這樣的人便成功。你現在去印度看看,其影響力到今時今日仍在,他們所消耗的能源少於中國,因為他們過自己傳統(簡樸)生活,印度好多有錢佬,但唔係個個阿差開車。總之,國家要建立自己的philosophy,一種對生活的態度,唔好一味追求物質,現在的人要威,要有『水』,開車唔係為自己comfort,是為了威,威俾以前老細睇,威俾仇家睇,威俾老竇老母睇,威俾舊同學睇,×!我以前會考肥佬,宜家開靚車,靚過哂你,你有冇?都唔知做乜叉!」

香港交通出名混亂,在香港開車開了這麼多年,陶傑可有投拆?

「×!有!成Q日整路,睇住佢衰,英國做得到,香港人做唔到,就是在整路方面。冇理性,一整路就唔理(長時間不斷整)。你睇雪糕筒,97前,雪糕筒擺得好直,距離兩百米前你已經知道前面停車,俾你有足夠時間轉線。現在就不同,雪糕筒都慳番,整架大車度有個大箭嘴就算,你一睇到就已經冇位走,試過幾次車禍就是因為這樣。

(窮人的ben屎)

英國佬好錫身,唔想交通意外有死人,交通system做得好穩陣,每樣設計得好完善。香港人車品好差,唔打燈、唔遞手,冇禮貌。英國人有理性,唔會胡亂響按,中國人就好躁。冇架車時都似番個人樣,上私家車就變了一頭畜牲,哈哈……德國道路冇車速上限,人人靠自我約束自律,作為汽車工業大國有它的原因。慶幸地,香港現在仍然食英國制度留低的老本,唔係太夠膽衝紅燈,這是法治的最基本精神,大陸就唔係,紅燈當綠燈,隨時u-turn……如果有一日見到交通好似大陸咁,時你就要移民!

英國汽車工業曾經風光一時,現時則完完全全被德國蓋過,很多英國品牌已被外人收購(如Jaguar和LandRover已被Ford收購),正式名存實亡,為甚麼?

「六十年代,全香港滿是英國車,Vauxhall、Morris……後來,英國汽車工業都轉向國有化,所以run得好差,完全唔註重design,不及日本佬進取,整下整下就在國際巿場衰落。英國車有個好處就是很穩陣、好實凈,壞處就是外形好叉老套,唔能夠貼住巿場。另外,六七十年代英國經濟唔好,冇一班年輕的行政人員買車,顧客愈來愈老化,加上經營不善蝕大本,好像積架這些老牌,最終都要落入人家手中。」

男人的疤痕

陶傑現在開的,是一部03年的黑色富豪S40。只得一年的新車,卻是滿身傷痕,不但泵把有花有凹,而且車側沙板更有如花面貓,滿是一條條痕。原來,陶傑對用車有又有一套獨特見解。「車上的花痕,就有如男人面上的疤痕,條條都充滿故事,背後都有一段歷史,女人就是喜歡問這些,太perfect,就即是油頭粉面,冇意思,車是買來用的!」

 

 
 

Copyright©光明頂 版權所有 備案編號:4419003004883 備案序號:粵ICP備10089552號