(淘)優品 (淘)優品
返回首頁 站內 Google 百度
光明頂:首頁陶傑文章 251 達爾文

進化論之父達爾文200歲冥壽,呢一位創造咗現代思想嘅偉大學者,好多人一定估佢生前係會考十科嘅優材生,其實唔係,達爾文嘅學術成績喺佢讀書嘅時候認真麻麻。

當佢好細個喺莎士貝利(Shrewsbury)讀梗中學嘅時候就曾經被踢出校,佢去到愛丁堡讀醫科嘅時候亦都半途而廢。

跟住就走咗去劍橋學神學,本來就諗住做牧師,點知喺劍橋讀神學嘅時候就遊手好閒,一日到黑唔上堂,走咗去附近嘅樹林嗰度打獵,同埋抓甲蟲嚟研究。

跟住咁嘅行為就令到佢嘅學業出現赤字,佢嘅父親就寫信去責罵佢,話佢你宜家到咗劍橋,呢個係你最後一個學習進修嘅機會,但係你仍然日日遊手好閒,淨係識得去「燒槍」,同埋拉住啲獵狗走去捉老鼠,你簡直係家庭、家族嘅羞恥,點知?

喺佢父親鬧佢嘅時候,達爾文喺佢生命中遇到最大嘅轉捩點,就係喺劍橋遇到一個植物學教授,呢個教授同佢一傾之下,非常之投契,講到好多嘅植物,同埋講到南半球一啲地方,同埋一啲歐洲人從來未見過嘅千奇百怪嘅生命。

喺呢位劍橋植物學教授嘅遊說之下,終於佢登上一架叫做Beagle嘅皇家戰艦,就向南太平洋出發,從此佢嘅生命改向揚帆出海,走上一段類似1492年哥倫布發現新大陸嘅歷史之旅喇。

達爾文二百歲冥壽係歐洲同埋美國係一件盛事,不但英國嘅BBC特登係拍咗一套記錄片紀念佢嘅成就,而且係西方嘅傳媒討論呢一位偉人,佢生前同埋死後對人類嘅貢獻,亦都係非常之熱門。

其實,達爾文係一個好受誤解嘅生物學家,有好多人以為佢係第一個公開挑戰《聖經》裏面創世記嘅學者,其實就唔係。因為早在1859年,佢發表《物種論》之前,好多維多利亞嘅學者,包括英國著名嘅地質學家李爾,就已經係質疑過《聖經》裏面講上帝係用七日創造世界同埋萬物嘅呢種說法。

係19世紀,其實有好多學者就已經出現一種「反神權」嘅思想,而達爾文從來無講過佢反對上帝。達爾文提出嘅《進化論》比起當代好多人,其實係屬於溫和嘅嗰一派,佢亦都無話呢個世界無神,否定上帝嘅存在。達爾文嘅《進化論》只不過係提出,係任何討論到宇宙同埋生命嘅設計嘅時候,上帝唔係惟一同埋必然嘅答案,因為咁,佢就成為一個二百年來都備受爭議最大嘅學者。

達爾文、弗洛伊德同埋愛因斯坦,被視為係現代三大智慧啟蒙之父。三大高手,佢哋嘅思想同埋學術成就,究竟邊個高,邊個低呢?或者佢哋不能夠相互比較,因為達爾文係著重外在嘅世界物種嘅變化,而弗洛伊德就發現咗人內在嘅心理世界,而愛因斯坦就對於人嘅外同埋內都不感興趣,超越咗人,而且將佢嘅視線係投向太空,同埋過去或者未來。所以呢三大高手華山論劍,或者愛因斯坦就係「東邪西毒」、「南帝北丐」之外嘅一個「中神通」,或者係武功最高嗰個都唔定。


 

 
 

Copyright©光明頂 版權所有 備案編號:4419003004883 備案序號:粵ICP備10089552號