(淘)優品 (淘)優品
返回首頁 站內 Google 百度
光明頂:首頁陶傑文章 252 火燒圓明園

佳士得拍賣行係法國巴黎拍賣圓明園兩件獸頭嘅事件,令呢個火燒圓明園嘅歷史事件再次受到關註。

當年,下令火燒圓明園嘅係一個叫做額爾金(Lord James Elgin)嘅英國外交官,佢係駐中國嘅high commissioner,即係話宜家嘅翻譯就叫做專員。佢本來就唔係當兵,不過係英國級別最高嘅外交官。當時係佢決定要火燒圓明園,變咗將呢個決定就話番畀當時嘅英國首相巴麥尊(Lord Palmerston)聽,巴麥尊聽到就覺得咁嘅手法會唔會激咗少少呢?但係所謂將在外,君命有所不受,於是維多利亞女王同巴麥尊都拎歪面,就任由額爾金放火。

講到呢個額爾金,嘩,犀利喇,講番佢嘅英文名加埋香港嘅譯名,個個都知佢係邊個,宜家住係半山,堅道行過啲,果條叫做伊利近街(Elgin Street),嗰個伊利近就係額爾金。我就唔係好明,點解伊利近街係要以一個當年也製造國恥嘅英國外交官嘅名嚟做街名呢?Lord Elgin點解今日會成為Soho一個高等華人雲集,名牌食肆,唔係話普通茶餐廳賣豬皮、魚蛋嗰啲,而係意大利菜、法國菜雲集嘅Soho嘅一個尊貴嘅地方,而青史留名我就唔知喇。

火燒圓明園歷史足版全溫,講到英、法就喺香港調隻戰艦去到渤海灣,喺九龍調大炮去炮轟塘沽,鹹豐皇帝就避走熱河。

當時,英國政府駐中國最高級嘅外交官係一個叫做額爾金(Lord James Elgin)嘅高級專員,呢位專員就僱有一個翻譯叫做巴夏禮,英文叫做Harry Parkes。巴夏禮率領英國、法國一個外交使節代表團共39人走入北京,同中國政府談判。

但係,因為嗰時鹹豐已經走咗去熱河,無人理,僧格林沁下面有班高唔高、低唔低嘅政務官,為咗要向皇帝表演,以示自己愛國,就竟然將39個英、法使節全部拉哂。一捉哂就慘喇,個個喺天津嗰度關住係一個木籠度,用一啲浸過水嘅皮帶勒到裹蒸粽咁。啱啱嗰時天時暑熱,勒得幾日唔放,嘩,慘喇!咁呢班39個英、法嘅使節個身度生咗啲屍蟲出嚟,但係個人仲「生歐歐」,仲有眼耳口鼻啲蟲爬哂出嚟。跟住熱河嗰個鹹豐皇帝無主意,於是下面啲大臣就決定將佢哋由天津押解去北京,沿路就奔波流離,搞到39人生又唔得,死又唔得,去到北京就關喺圓明園嘅天牢裏面。結果《泰晤士報》隨行記者最先頂唔住就死咗,另外嗰班人亦都喺咁嚴苛嘅環境之下就死咁一大半,期間亦都有清朝嘅官員對佢哋嚴刑拷打。

最後,雖然放番哂出嚟,39人就剩番19個,死咗20個咁多。消息就傳返去英國同埋法國,英國同埋法國人民感情自然就大受傷害,見到自己嘅外交使節死得咁慘,於是喺民意同埋議會一致支持之下,英、法兩國政府就決定要燒一座宮殿報復。當時燒邊一座有異議,法國人就認為不如燒哂成個紫禁城,英國有啲理性——唔得,由於事件罪惡發生係圓明園,就放火燒圓明園吧

1860年,英、法聯軍火燒圓明園嘅事件,係今日中國歷史嘅教科書就係講火燒圓明園嘅結果,聽鄭少秋嗰首流行曲,都係將個原因按下不表。點解火燒圓明園呢?講一個插曲,就係英國決定火燒圓明園,法國就想燒紫禁城,結果拗嚟拗去英國佔上風。

係火燒之前,呢個額爾金,呢個駐中國嘅英國最高專員就喺北京城牆就貼上告示,講明邊一日幾時燒,同埋勸喻北京嘅市民唔好行埋去。結果,當時嘅北京人係度睇,睇完個告示個個唔係冷漠就「笑騎騎」,點解?第一,裏面個告示唔知搵啲乜嘢師爺寫嗰啲三流嘅:「如要停車,乃可在此」嘅中文,嗰啲北京人笑英國人中文不通;第二,個個都覺得嗰時太平天國作亂,遲早都打入嚟北京,一入北京,你英國唔燒改朝換代,餵,以前呢個劉邦、項羽推翻秦始皇都係一把火燒咗阿房宮,咁你唔燒,到時太平軍都會燒,所以覺得無所謂。

結果圓明園就如期咁一把火燒咗,第一次就唔係燒哂,跟住幾十年來嗰啲太監、當地啲盜墓賊就不斷走入去偷嘢,今日咪變咗宜家一片破敗嘅風景。


 

 
 

Copyright©光明頂 版權所有 備案編號:4419003004883 備案序號:粵ICP備10089552號